Hi!

Kamusta kamo nanay ag tatay, pati kang manong, manang ag toto!

Sa mga tiyuhon ag tiyahon raha sa Sibale, kamusta gihapon sa inrong tanan!

Kang nanang ag tatang, haruan yang ako sa inra pagkamo’y magpatukar sa bukir!

Mauno ngasing ka bunga it nidog? Tig-pila ray ka kilo it kopras?

Mauno ka paragat ag pamukot it mga tawo? Kaado pa baga kag inro sayap ag yada?

Ako ay ina-hilas it bislar ag pakasam nak di-puga it arangha! Rugay ray nak waya natagam it kinaydong balenghoy ag rabuan nak mais! Kayasaw it santol at batuwanan! Gusto nakong mag-higop it sabaw it butong! Ging hahanap nako ka ginat-ang tawan ag pati pinangat nak ibis!

Maramo pa baga kamong alagang hadop? Mauno ka kita it inro tinrahan? Baleng pulos utang ray – igug-badar pa man namo it matrikula ngasing nak buyan! Sa uno ka inro pahalabas it nidog?

Yaki, maunoy ka inro yawas? Naghahapros pa baga kinang inro likor? Baleng kina ay sa inro pag-upos? Kinang biha, aya baga ninro nipakalata sa pasamanos ag kabhaan it bayay! Kinang tura para isag sa hapon, hipira sa tagong lugar! Kung sarang, badaiy kamo ni panabako! Kaunan yang niro it kendi kung kamo ay makaramdam it hilab! Alaga-i ka inro yawas it maado!

Kamusta yaki si nanang ag si tatang? Kaya pa baga ninrang mag-rukay sa uma? Nag-mama ag nagmamaskada pa baga sinra? Si-o ka nagtatawog it bunga? Maramo pa baga sinrang mga nakatagong ruyugrugay, apog ag budo?

Sa tiyo ag tiya, kamustahan yang sa inra? Sige pa baga ka sangot ag suyop ninra it tuba? Mauno ka inra alagang baktin? Basta higtan yang it maado sa puno it pidapi para indi makabuhi ag makapang-ibok it mga tinanum ag utanon! Karamo pa baga sinrang alagang baka ag kambing? Sigarudaha yang nak buko sa mahanrig naka-higot ag naka-agsam ka inra hadop para indi mabadugtong!

Tan-a si manong ag si manang ay perming nakakabulig sa inro; sa pag-laba ag pag-yaya in banig, sa pagsag-ob ag si-ak it kahoy! Matag-uyanon ray, kailangang maramo kitang mga pang-rabok, miskan kina ay paywa ag udo! Habang mainit ka silak it adlaw, magbuyar it maramong panran!

Si toto ay nag-uuno? Kamusta ka ida pag-eskuwela? Baleng pulos idamo yang kanatutun-an – mag-idamo it lastiko ag mag-patlaw it baru-baroto! Silingga nak mag-aray it maado, ag buko pulos idamo, o kada ay magbuyang nak di tari ay siit it arangha!

Kinang ato mga kayungot, mauno ra sinra? Kamusta yang ganat? Basi pang sinra ay pulos maado, waya gi-pipinaluko!

Kamusta yang gihapon sa ako mga “kaberks”, tan-a sinra gihapon ay nagsisikap nak makatapos it pag-eskuwela ag makapag-trabaho gihapon, kaysa yang naka-istambay ag maghapong nag-iinuman – nakakapurhisyo sa alagang hadop it ibang tawo!

Kamusta yang uli sa inro! Permi kita pangamuyo sa Diyos nak taw-an it matigson ag makusog nak yawas!

Nagtatahur ag nagpapalangang anak!

Manny