Halin Sa isla si Huwan mapagto sa Maynila. Paaga it bati pramas indi mabada-an it motor.
Pag-abot sa pantalan nagsasakayaniy ka mga pasahero, medyo batlaw kainaman. Si Huwan ay medyo napasikmat pero indi makakalit nak subaling mabadaan.
Diretso sakay ag ing puor-puor yangiy kag nararamdaman.
Pagrunggo sa Pinamalayan ay pagkasahoy kag nagpapangayaba nak masakay sa van paagto sa Calapan.
Sakayan ka mga pasahero nak yagor ka byaheng alas 10:00 nak barko.
Nasampot sa Calapan ay pahalinoniy kag barko kada rali-rali it sakay kag mga pasahero it van. Sa pagrali-rali ay medyo na stress si Huwan. Nalimtan kag pagsikmat.
Sa Batangas agawan sa biyaheng Lawton. Nakasakay gihapon si Huwan. Bandang Lipa ay napasikmat ray. Medyo matindi ngasing. Talagang nupay hagtoy sa pwerta. Indi ra ka utot nak subaling numunot. Pasimyat-simyat si Huwan sa ingrarayanan pero halos punoiy it establisyemento kada wayat mapwestuhan kung abi.
Natiis pa it maisoting oras pero pag-abot sa Canlubang ay talagang indiiy matiis. Pumara ag kumalit sa inggwa it cogonan. Tumiwar si Huwan ag nakaraos gihapon. Nagpapangiwangiy it kag ida narunggan kag silbato. Usang pulis nakita si Huwan:
Pulis: Manong, asing waya ra ikaw gi pupayado.
Huwan: Kabo, kung sador yang nimo, halin pa ako sa isla, ngasing imo asilinggon magpupayado pa ako? Ay talagang!!