Kina-insulipang Waya’t Kahihingwatan …

Kina-insulipang waya’t kahihingwatan …
By: Merwin F. Mosquera

Sa ayat it ragat, mahapros sa mata!
Raya’t bibisar-on ka kahangit ay pay bayur,
Miskan nio’t imong gaur, gusto kang payub-gon!
Nio arang mamanwa kaleng ato napuyon?

Tuk-i anay ninro, libu-o ay marayum;
Mga hangit nak kalag, sa tampilan gi papalipur;
Suuri baga ninro, sinra ay sikwaton;
Agur ka at banwa ra ay mag him-ong.

O Sibale, sa tunga it “lana” nak maitum!
Sa ak kahilak sa imo ako’y napapayumam-or;
Dahil sa bisyu’t mga kalag nak kaguran,
Sa yuba’t hungkag ikaw ay tumikrag;

Kalulo-uy – banwang dati’y masadya!
Sa huytok nak manglot, ikaw ay nasiklop;
Sikwata baga kali ninro agur makabuhi;
Sa yaing binuhatan, Sibale’y magtanrung!

Kamong mga kalag sa yungib it kukurton,
Liwas baga kamo raha, ramay-ramay kita.
Baleng ma-abat kita’y Sibale’y mabanrug,
Sa kina-insulipang waya’t kahihingwatan
… kung kita ay perming nagpapalipur!

amor

Posted by under Literary and Poems. Posted on February 25, 2008. Modified on February 27, 2008 .

Share on Facebook

One Response to “Kina-insulipang Waya’t Kahihingwatan …”

Leave a Reply

You must be logged in to post a comment.