Salamat rili sa inro pagtan-aw!

Masadyang panimatian sa “Maghinale” ka pagkaka-usa riling pangabay nak makahimo kita it sarili natong “disksyunaro” ag “ensaykopihiya”!

Kung imaw kali it parayan para riling panambitan nato ay mahinabo, maganda ngani kung ka tanang banwang “Asi speaking” ay mag binulig-bulig sa pag-patikyar ag patigayon rili sa ato wiki wiking bisaya ag rilang ing lalabi-labi.

Udon ako riling inro adhika. Ayam nako nak imaw kali it pananamgo it mga Bantoanon nak magka-ingwa it “Bantoanon Vocabulary” gihapon, riling site nak ako nasil-ip — http://bantonfriends.spruz.com/main.asp?page=content

Imaw gihapon kali it pananamgo ag pangamuyo it mga Sibalenhon nak sa tunga it kakusugan ay malampasan ka mga ragkong bayur bilang hamon riling amo natuna-aniy nak “Asi Dictionary” ag “Asipedia”!

— http://www.sibale.amorfrancis.com/asi-dictionary-asi-english-tagalog.php
— http://www.sibale.amorfrancis.com/asipedia.php

Tama ka, tan-a maramo pang magyunsor ag magyakot nak ato mga kasimanua …!

Imaw kali ka at ukaw, “but-aw kita ag mag-yusrog sa halip nak kita’y magruyog!”

Maramong salamat at masadyang adlaw sa inrong tanan!

- Merwin

pay pagkaagnum kung kitang tanang Asi speakers ay magkausa sa paghuman it ASI encyclopedia. Sa ato pagsanrokan it ato mga bisaya ay mas mapapaprilham pa ka bisayang Asi. Maramo ag marayum pa ka ida bibisar-on ag pagiging linguahe.

Rugay nakong pananamgo nak magkaingga it collaborative efforts ka tanang Asi speakers ag maghuman it online dictionary. Halos an-umey nak tuig ka nagligar it kag akoy naghuman it online dictionary it Asi. Puedeng magyakot tanang mga Asi, bantoanon, sibalenhon, simaranhon, calatravanhon ag odionganon ag mga nagbibisaya it Asi sa Tagalog region tuyar it Mindoro, Marinduque, Batangas ag iba pang ringkon.

Kung tan-ay ingga it sarang ag oras ay puedeng maghuman it Asi Wikipedia. Pero kung kitang tanang inggat ayam sa teknolohiya it computer ag internet ay magkakausa ay kita’y makakahuman it pareho sa Wikipedia.

Puede tan-ang ngayanan nato kali it Asi wiki-wiki. Ayam natong mga Asi nak kiing wiki-wiki ay ka katumoy nak bisaya ay matulin ag uya puat nak bisaya. Imaw guihapon sa Hawaiian nak ka wiki wiki ay ‘quick’.

Ako’y nag-iimbita sa tanang Asi speakers nak ingga’t sarang, magkausa kita ag mahuman it Asi wiki-wiki.

Naparayan yang si Ryan, usang Bantoanong nagtutuy-og sa pagbisaya it Asi.

Puyde bagang magsaligbat kaleng hale ninrong bantoanon nak nag-istar it marugay-rugay sa sibale?

Pagkaado kinang inro ing poprokurar nak mag human it “asi encyclopedia” ag asi dictionary. Sa ako pagkaayam ay inggwa gihapon ka mga bantoanon (ag imaw ra gihapon siguro ka simaranhon) it kaparehong proyekto. Buko baga mas maado kung pag usahon yangey kina. Mas maalwan, mas marali, mas maisot nak budget dahil mas maramo ka mapas-an, ag mas maadong muyatan dahil tanang rugong ASI ay nagkakausa adong mahugot sa pagkapuslok ka ato relang ing lalabi labi.